# Ald. epp. 118-126

Aldhelm, Ald. epp., 118 to 126. Latin.

Canonical: https://interlinea.aeterna-institute.org/library/latin/aldhelm/ald-epp/118
JSON: https://interlinea.aeterna-institute.org/api/v1/library/latin/aldhelm/ald-epp/118

Quis enim, quaeso, tam durus atroxve labor existens ab illo vos antistite separans arceat, qui vos ab ipso tirocinio rudimentorum et a primaeva tenerae aetatis infantia usque adultae pubertatis florem nutriendo, docendo, castigando paterna provexit pietate et quasi nutrix gerula dilectos alumnos extensis ulnarum sinibus refocilans sic caritatis gremio fotos clementer amplexus est? Perpendite, quaeso, creaturarum ordinem eique divinitus insitam naturam, quatenus ex minimarum rerum collatione inflexibilem conversationis formam Christo favente capiatis! Quomodo examina apum calescente caelitus caumate ex alveariis nectare flagrantibus certatim emergunt et earum auctore linquente brumalia mansionum | receptacula densarum catervarum cohortes rapido volatu ad aethera glomerant, exceptis dumtaxat antiquarum sedium servatricibus ad propagationem sobolis futurae relictis! Ecce, inquam, mirabilius dictu, rex earum spissis sodalium agminibus vallatus cum hiberna castra gregatim egreditur et cava stipitum robora rimatur, si pulverulenta sablonis aspergine praepeditus seu repentinis imbribus cataracta Olimpi guttatim rorantibus retardatus fuerit et ad gratam cratem sedemque pristinam revertatur, omnis protinus exercitus consueta vestibula perrumpens prisca cellarum claustra gratulabundus ingreditur.... Si ergo taliter creatura (ratione) carens, quam iura naturae indita absque legibus scriptis gubernant, reciprocis temporum successionibus ductoris praecepto paret, respondete, rogo, utrum horrendae abominationis infamia sint exprobrandi, qui concessa septiformis spiritus gratia praediti devotae subiectionis frena ritu frenetico frangunt. Cur autem diversarum rerum ratiociuationes conglobans ad instiganda vestri pectoris praecordia stridente calamo percurram, audite! Ecce, saeculares divinae scientiae extorres si devotum dominum, quem in prosperitate dilexerunt, cessante felicitatis opulentia et ingruente calamitatis adversitate deseruerint ac secura dulcis patriae otia exulantis domini pressurae praetulerint, nonne execrabilis cachinni ridiculo et gannaturae strepitu ab omnibus (digni) ducuntur? Quid ergo de vobis dicetur, si pontificem, qui vos nutrivit et extulit, in exilio solum dimiseritis?..... DOMINO IN DOMINORVM DOMINO DILECTISSIMO WINBERHTO ALDHELMVS SERVVS SERVORVM DEI IN ANGVLARI DVORVM TESTAMENTORVM LAPIDE DE SVMMIS MONTIVM VERTICIBVS ABSCISO, QVI STATV AM QVATERNO METALLORVM GENERE FABRE PACTAM QVATERNA POPVLORVM REGNA SIGNANTEM CONTRITO CRVRATENVS AVRATO CAPITE OPPRESSIT, SALVTEM.

---

Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
