# Ald. epp. 64-70

Aldhelm, Ald. epp., 64 to 70. Latin.

Canonical: https://interlinea.aeterna-institute.org/library/latin/aldhelm/ald-epp/64
JSON: https://interlinea.aeterna-institute.org/api/v1/library/latin/aldhelm/ald-epp/64

Quam ob rem tuum affabilem discipulatum ceu cernuus singultatim arcuatis poplitibus subnixisque precibus efflagito, ut oblitterata nequaquam memoria excedat, quod Pacificus caelitus ambrosia praeditus, subrogatus genitore iure hereditario, bis quaternis temporum lustris Israhelitici plebis imperii sceptro fungens almo auctus spiramine prompsit dicens: Bibe aquam de cisterna tua et fluenta putei tui; diriventur fontes tui foras et in plateis aquas divide; solus habeto eas nec sint alieni participes tui. Quapropter his sacris imbutus sagminibus iugi conamine orthodoxiae aperito gurgitem et sitientia rigato arva mentium, quatinus germen aethralis extaseos vivis fecundisque in orthodoxorum satoris sudore sulcis satum nullo torridae obstaculo siccitatis obtinente, pululans glescat et ubertim spissa Dei suffragio seges demum maturescat. Nam idcirco supplex tam obnixe haec cernitur oramen suggessisse, quod nonnulli superna noscuntur sofia praediti et arcana luce inormiter referti, attamen, quod gratuita caelitus munificentia Deique dapsili deditione receptantes, proprio facessante meritorum quaestu, adepti sunt, nequaquam gazofilacio scientiae reserato plene promulgantes, sed particulatim lurconibus largientes. Nam cata evangelicae experimentum auctoritatis nequaquam flagrans lichinus clancule fuscata tetrae occulitur latebra urnae, qui candelabri summitate cunctis limpido lumine lucere decuit; necnon frustra talenti foenora subterraneis clanculantur obstructa sablonibus, quae trapezitarum numerosis monetae oportuissent nummismatibus profligari, ne forte, ut iners adepto segnitia torpens mancipium talento, suppremos ergastulorum in squalores trusus praecipitaretur, sed potius – euax eugeque! –, | ingressurus tripudium a prosatore pio promereatur. Unde psalmigrafus vates ob hoc, propriae piaculi expians flagitium conscientiae, sacro praesagio orsus infit: Iustitiam tuam non abscondi et reliqua. Sed haec misellus homuncio dictando volvens scrupulo ancipiti extemplo quatiens angebar. Cur, inquam, Hibernia, quo catervatim istinc lectitantes classibus advecti confluunt, ineffabili quodam privilegio efferatur, acsi istic, fecundo Britanniaeincespite, dedasculi Argivi Romanive Quirites reperiri minime queant, qui caelestis tetrica enodantes bibliothecae problemata sciolis reserare se sciscitantibus valeant?

---

Aldhelm, Ald. epp.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
