Book 20, Chapter 9

Qualibus verbis delectari solitus sit Antonius Iulianus, positis in mimiambis Cn. Matii; et quid significet M. Cato in oratione quam scripsit de innocentia sua, cum ita dictitat: numquam vestimenta a populo poposci. Delectari mulcerique aures suas dicebat Antonius Iulianus figmentis verborum novis Cn. Matii, hominis eruditi, qualia haec quoque essent, quae scripta ab eo in Mimiambis memorabat: Sinuque amicam refice frigidam caldo, Columbulatim labra conserens labris. Item id quoque iucunde lepideque fictum dictitabat: Iam tonsiles tapetes ebrii fuco, Quos concha purpura imbuens venenavit …