# Commemoratio Professorum Burdigalensium 26

Ausonius, Commemoratio Professorum Burdigalensium, 26. Latin.

Canonical: https://interlinea.aeterna-institute.org/library/latin/ausonius/commemoratio-professorum-burdigalensium/26

VALETE, manes inclitorum rhetorum:
valete, doctores probi,
historia si quos vel poeticus stilus
forumve fecit nobiles,
medicae vel artis dogma vel Platonicum
dedit perenni gloriae:
et si qua functis cura viventum placet
iuvatque honor superstitum:
accipite maestum carminis cultum mei
textum querella flebili.
sedem sepulcri servet immotus cinis,
memoria vivat nominum,
dum remeat illud, iudicis dono dei,
commune cunctis saeculum.

---

Ausonius, Commemoratio Professorum Burdigalensium, ed. Hugh G. Evelyn-White. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/stoa0045/stoa004/stoa0045.stoa004.perseus-lat2.xml.