Latin · ~2 min
Lines 1-2
Ausonius, De Bissula 1-2
Not analysed yet
UT voluisti, Paule, cunctos Bissulae versus habes,
lusimus quos in Suebae gratiam virgunculae,
otium magis foventes, quam studentes gloriae,
tu molestus flagitator lege molesta carmina,
tibi, quod intristi, exedendum est :sic vetus verbum iubet,
compedes, quas ipse fecit, ipsus ut gestet faber.
CARMINIS incompti tenuem lecture libellum,
pone supercilium,
seria contractis expende poemata rugis:
nos Thymelen sequimur.
Bissula in hoc scedio cantabitur, haut Erasinus:
admoneo, ante bibas,
ieiunis nil scribo; meum post pocula si quis
legerit, hic sapiet.
sed magis hic sapiet, si dormiet et putet ista
somnia missa sibi.