Latin · ~3 min
Poem 106
Ausonius, Epigrammaton Liber 106
Not analysed yet
THERMARUM in solio si quis Polygitona vidit
ulcera membrorum scabie putrefacta foventem,
praeposuit cunctis spectacula talia ludis.
Principio tremulis gannitibus aera pulsat
verbaque lascivos meretricum imitantia coetus
vibrat et obscenae numeros pruriginis implet.
brachia deinde rotat velut enthea daemone Maenas;
pectus, crura, latus, ventrem, femora, inguina, suras,
tergum, colla, umeros, luteae Symplegadis antrum.
tam diversa locis vaga earnificina pererrat,
donec marcentem calidi fervore lavacri
blandus letali solvat dulcedine morbus.
desectos sic fama viros, ubi cassa libido
femineos coetus et non sua bella lacessiti
irrita vexato consumere gaudia lecto,
titillata brevi cum iam sub fine voluptas
fervet et ingesto peragit ludibria morsu:
torpida non aliter Polygiton membra rescivit.
et, quia debentur suprema piacula vitae,
ad Phlegethonteas sese iam praeparet undas.