# [Libri de Fastis] Conclusio 2-4

Ausonius, [Libri de Fastis] Conclusio, Lines 2-4. Latin.

Canonical: https://interlinea.aeterna-institute.org/library/latin/ausonius/libri-de-fastis-conclusio/2

NOSTRUM
ANNIS undecies centum coniunge quaternos,
undecies unumque super trieterida necte.
haec erit aeternae series ab origine Romae.
HACTENUS adscripsi fastos, si sors volet, ultra
adiciam: si non, qui legis, adicies,
scire cupis, qui sim? titulum, qui quartus ab imo est,
quaere: leges nomen consulis Ausonii.
urbis ab aeternae deductam rege Quirino
annorum seriem cum, Procule, accipies,
mille annos centumque et bis fluxisse novenos
consulis Ausonii nomen ad usque leges,
fors erit, ut, lustrum cum se cumulaverit istis,
confectam Proculus signet Olympiadam.

---

Ausonius, [Libri de Fastis] Conclusio, ed. Hugh G. Evelyn-White. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/stoa0045/stoa017/stoa0045.stoa017.perseus-lat2.xml.