# Opuscula 21.2

Ausonius, Opuscula, XXI. Caesares., Monosticha de Ordine Imperatorum.. Latin.

Canonical: https://interlinea.aeterna-institute.org/library/latin/ausonius/opuscula/21.2
JSON: https://interlinea.aeterna-institute.org/api/v1/library/latin/ausonius/opuscula/21.2

Primus regalem patefecit Julius aulam
Caesar et Augusto nomen transcripsit et arcem.
privignus post hunc regnat Nero Claudius, a quo
caesar, cognomen Caligae cui castra dederunt.
Claudius hinc potitur regno. post quem Nero saevus
ultimus Aeneadum. post hunc tres, nec tribus annis:
Galba senex, frustra socio confisus inerti,
mollis Otho, infami per luxum degener aevo,
nec regno dignus nec morte Vitellius ut vir.
his decimus fatoque accitus Vespasianus
et Titus imperii felix brevitate. secutus
frater, quem calvum dixit sua Roma Neronem.

---

Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000793.zip.
