# Opuscula 22

Ausonius, Opuscula, 1. Ausonius Hesperio Filio sal. (Consulari Libro Subiciendi Quem ego ex Cunctis Consulibus Unum Coegi Gregorio ex Praef.).. Latin.

Canonical: https://interlinea.aeterna-institute.org/library/latin/ausonius/opuscula/22
JSON: https://interlinea.aeterna-institute.org/api/v1/library/latin/ausonius/opuscula/22

Ignota aeternae ne sint tibi tempora Romae,
regibus et patrum ducta sub imperiis,
digessi fastos et nomina praepetis aevi,
sparsa iacent Latiam si qua per historiam.
sit tuus hic fructus, vigilatas accipe noctes:
obsequitur studio nostra lucerna tuo.
tu quoque venturos per longum consere Ianos,
ut mea digessit pagina praeteritos.
exemplum iam patris habes, ut protinus et te
adgreget Ausoniis purpura consulibus.
2. SVPPVTATIO AB VRBE CONDITA IN CONSVLATVM NOSTRVM.
Annis undecies centum coniunge quaternos,
undecies unumque super, trieterida necte:
haec erit aeternae series ab origine Romae.

---

Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000793.zip.
