# Opuscula 32

Ausonius, Opuscula, XXXII. de Aetatibus Animantium. Hesiodion.. Latin.

Canonical: https://interlinea.aeterna-institute.org/library/latin/ausonius/opuscula/32
JSON: https://interlinea.aeterna-institute.org/api/v1/library/latin/ausonius/opuscula/32

Ter binos deciesque novem super exit in annos
iusta senescentum quos implet vita virorum.
hos novies superat vivendo garrula cornix,
et quater egreditur cornicis saecula cervus.
alipedem cervum ter vincit corvus, et illum
multiplicat novies Phoenix, reparabilis ales.
quem nos perpetuo decies praevertimus aevo,
Nymphae Hamadryades, quarum longissima vita est.
haec cohibet finis vivacia fata animantum.
cetera secreti novit deus arbiter aevi:
tempora quae Stilbon volvat, quae saecula Phaenon,
quos Pyrois habeat, quos Iuppiter igne benigno
circuitus, quali properet Venus alma recursu,
qui Phoeben, quanti maneant Titana labores,
donec consumpto, magnus qui dicitur, anno
rursus in anticum veniant vaga sidera cursum,
qualia disposita steterant ab origine mundi.

---

Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000793.zip.
