Latin
IIII. Ephemeris ID est Totius Diei Negotium., 2. Parecbasis.
Ausonius, Opuscula 4.1
Not analysed yet
Puer, eia, surge et calceos
et linteam da sindonem.
da, quidquid est, amictui
quod iam parasti, ut prodeam
da rore fontano abluam
manus et os et lumina.
pateatque fac sacrarium
nullo paratu extrinsecus.
pia verba, vota innoxia
rei divinae copia est.
nec tus cremandum postulo
nec liba crusti mellei
foculumque vivi caespitis
vanis relinquo altaribus.
deus precandus est mihi
ac filius summi dei,
maiestas unius modi,
sociata sacro spiritu.
et ecce iam vota ordior
et cogitatio numinis
praesentiam sentit pavens –
pavetne quicquam spes, fides?