# Aratea 1051-1095

Avienus, Aratea, Lines 1051-1095. Latin.

Canonical: https://interlinea.aeterna-institute.org/library/latin/avienus/aratea/1051
JSON: https://interlinea.aeterna-institute.org/api/v1/library/latin/avienus/aratea/1051

His se bis senis sol admouet, hisque recurrens
omnibus absoluit totos reparabilis annos.
Quem cum signiferi graditur sol aureus orbem,
singula frugiparos attollunt tempora uultus.
Illius Oceano quantum submergitur alto,
tantum tellurem supereminet. Omnibus iste
noctibus illabens pelago sex inserit astra,
sex reparat. Tanto nox umida tempore semper
tenditur, extulerit quantum se circulus undis
At si scire uelis mora lucem quanta retentet
et quanto nox atra sibi trahat otia lapsu,
quae procul Oceano consurgunt signa notato:
horum semper enim comes est Titanius uni.
Horum prima oculis memor incunabula quaere,
luminis ipsa uagi captans uenatibus, ipsa,
ipsa notans mundo. Quae si se nubibus abdent,
aut si, cum surgunt, ut tellus saepe tumescit,
occultata iugo praetentaque rupe latebunt,
prompta uia est aliis uenientum tempora signis
noscere: namque ipso deprenderis indice cuncta
Oceano, magnam qui circum amplectitur undis
tellurem, curuet celando ut litora mundo
latius atque sinu patuli salis hauriat astra.
Istius indicium praebebunt cornua semper,
uel matutino qua perstrepit aera fluctu,
acer Atlantei uel qua furit aequoris aestu.
Nam non obscurae, cum Cancer commouet ortum,
Oceano stellae circumuoluentur utroque,
in freta labentes aut quae <se> rursus Eoi
parte ferunt mundi. Minoae clara Coronae
serta cadent, Austri tergo cadet incola Piscis;
hunc medium pendere tamen mediumque sub undas
cedere per spinam, rutila labente Corona,
semper suspicies. At tergi plurima uersum
uentre tenus summo supera inter sidera cernes:
os et colla dehinc et pectora uasta per aequor
mersantur. Premit ab genibus celsos Ophiuchum
usque umeros Cancer, Cancer premit ortus et Anguem,
agmine qua uasto fluitat caput, aspera ceruix
qua tumet et spiris qua turgent pectora primis.
Parte nec Arcturus distabit multus utraque:
iam minor in superis, iam uiscera plurimus alto
conditur; hunc etenim consortem quattuor astris
Oceanus recipit. Satur hic uix luminis, omnis
cedit et inspiciens tandem conuexa relinquit.

---

Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/AVIEN%7Carat%7C001.
