# Aratea 1227-1271

Avienus, Aratea, Lines 1227-1271. Latin.

Canonical: https://interlinea.aeterna-institute.org/library/latin/avienus/aratea/1227
JSON: https://interlinea.aeterna-institute.org/api/v1/library/latin/avienus/aratea/1227

Mercurialis item Lyra uoluitur, altaque Cepheus
cardine sustollens uestigia gurgite nondum
pectora liber agit, sed pectora mersus in undas
plaustra Lycaoniae pulsat pede desuper Vrsae.
Tempore non alio magni Canis ignea cedunt
sidera, protentum freta iam procul Oriona
hauserunt pelago, toto Lepus occidit astro.
Tum quoque et Oceano fugientem Sirius urget.
Sed non Aurigam, cum gurgitis ille profundi
ima petit pedibus, Capra mox Haediue sequuntur:
ista polo rutilant, illum uada liuida condunt.
Haec membris discreta aliis exstantiaque alte
laeuum umerum et summae sese attollentia palmae
cernuntur, donec labenti congrada soli
sidere deuexo freta late caerula turbent.
Namque manum Aurigae reliquam celsumque corusci
uerticis et dorso qua spina attollitur alto
deprimit hirsuti sidus surgens Capricorni
- membra Sagittigero cedunt postrema reuecto -.
Iam non alatus remoratur uiscera Perseus
aeris in spatiis, neque clauum uindicat Argo
alluuione sali: Perseus, pede denique dextro
atque genu liber, mersatur cetera ponto;
Argo, quod curuis puppim super attrahit oris,
tinguitur et duro tangit uada caerula dorso.
Ipsa dehinc manet exortum gelidi Capricorni,
totaque tum pelago caelo descendit ab alto
aequora tum Procyon, gressum sectatus erilem,
intrat et Oceano permutat celsa profundo.
Haec habet occidui plaga gurgitis, ista sonoro
supprimit unda salo. Rursum procul erigit aethra
Cygnum Aquilamque Iouis, surgunt flammata Sagittae
sidera perque Notum rutilat tum numinis Ara,
Delphinum paruas promit Capricornus in auras.
At matutino cum surgit Aquarius orbe,
os Equus atque pedes nouus exserit. Ecce cadentis
parte poli trahit occiduum nox atra sub aequor
Centaurum cauda, sed non caput aut umerorum
uasta simul recipit: persistit pectore celso
cornipedis species et caelum uertice fulcit.
Ora dehinc Serpens et prima uolumina tantum
conditur: ingentis late tamen agmina caudae
pone trahit. Subit ista salum, subit aequora rursum,
integer Oceani cum se Centaurus in undas
iecerit atque nouo uibrarint sidere Pisces.

---

Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/AVIEN%7Carat%7C001.
