Latin
Lines 1820-1863
Avienus, Aratea 1820-1863
Not analysed yet
Contemplator item: si longo plurima ponto
agmina festinant uolucrum solidamque frequentes
succedunt terram, sterilis desaeuiet aestas
ac sitient agri. Nam qua circumflua tellus
adluitur pelago, coquit altas siccior aer
caespitis arentis uenas, citiusque calorem
sentit humus sic cincta salo. Fuga protinus ergo
est auium in terras; pauet, has ut uiderit, aestus
agricola et sicco iam deflet mergite culmos.
Sed si se modico producant agmine ab undis
nec trepido passim uersent conuexa uolatu,
laetitia est duris pastoribus: adfore parcos
praesumunt imbres. Sic in contraria semper
uota homines agimur, nostrique cupidine fructus
poscimus alterius dispendia. Sed cuique ipsa
sollers natura et rerum genitabilis ordo
certa suis studiis adfixit signa futuri.
Namque et ouis cupido si gramina tondeat ore
insaturata cibis, decerpens latius agros,
pastori indicium pluuialis frigoris edet;
et si persultans aries lasciuius herbas
appetat aut sese sustollant saltibus haedi
uel si iuge gregi cupiant haerere nec usquam
matribus abscedant, et si sine fine modoque
pabula delibent cum tutas uesper adire
compellat caulas, monstrabunt adfore nimbos.
Bubus arator item trahit atrae signa procellae,
lambere si lingua prima hos uestigia forte
uiderit aut dextrum prosternere corpus in armum,
uel si prolixis auras mugitibus implent,
pascua linquentes uix uespere. Dat capra moti
rursum signa poli, cum spinis ilicis atrae
multa inhiat. Docet haec eadem sus horrida caeno,
gurgitis illuuie si saepius inuoluatur.
Martius ipse lupus, uillarum proxima oberrans
affectansque locos hominum lectumque laremque
sponte petens, crasso consurgere nubila caelo
praemonet. Id parui cum stridunt denique mures,
cum gestire solo, cum ludere forte uidentur,
portendunt tibimet; canis id praesentit adultis
tellurem fodiens. Tamen haec, tamen omnia rerum
adfore uel primo nimbos mox sole docebunt,
uel cum curriculis lux ibit coepta secundis,
tertius aut uerso cum uenerit ortus Olympo.