# Aratea 372-416

Avienus, Aratea, Lines 372-416. Latin.

Canonical: https://interlinea.aeterna-institute.org/library/latin/avienus/aratea/372
JSON: https://interlinea.aeterna-institute.org/api/v1/library/latin/avienus/aratea/372

Nam Lacedaemoniis, Mars cum caluisset Aphidnis,
Castora Cecropii tulit inclementia belli.
At frater, lucemque et fata superstitis aeui
exosus, sortem lacrimis efflagitat aequam.
Protinus alternae germanos tempore uitae
Iuppiter attollit, caelique in celsa receptans
aeternae flagrare facis iubet ignibus ambo.
Aluo Helices Cancer subuoluitur, astraque Cancro
Iuno, nouercales ut semper proderet iras,
praestitit. Hic etenim, Lernaei gurgitis hydram
ureret Alcides cum flammiger, ausus in ipsum
repere uictorem. Qua duro concaua dorso
tegmina curuantur, geminus micat ardor in auras.
Hos dixere Asinos, ortos Thesprotide terra
et sidus, Lenaee, tuum; disterminat aer
crassior hos itidem qualis praesepibus esse
forma solet. Dispar chelarum flamma coruscat:
namque tribus stellis adoletur dextera Cancro,
laeua duas pigro succendit fomite flammas.
Qua postrema pedum rutilant uestigia in Arcto,
maxima flammigeri mundus trahit ora Leonis.
Membra dehinc, longi quae semet tramite caeli
plurima protendunt, torrentur fomite acuto
singula et adsiduis ardet Leo uiscera flammis.
Hic Hyperionii flagrat uia Solis, et isto
se duce caerulei referunt momenta caloris.
Tum succisa Ceres stabilito mergite culmi
construitur, flauos tondentur semina crines
omnia, et aduectas late coquit area messes.
Tunc et Threicii repetunt animosa Aquilones
flabra polo, tunc coeaneum stata flamina caeli
propellunt pelagus: longis hoc tempore in anni
otia sunt remis, pontus uehit ipse carinas.
Aurigatorem par sit quoque cura uidere:
namque tuas aures impleuit fabula sollers
Cretaei pecoris, sic lac memoratur alumno
infudisse Ioui; Capra, nutrix dicta Tonantis,
stelligero subuecta polo est. Ille impiger autem
pulcher Erichthonius currus et quattuor olim
iunxit equos, pronus <qui non> procul in Geminorum
laeua iacet fusoque super se corpore tendit
plurimus, atque Helices caput inclinatur ab ore.
Ille quidem in spatium membra explicat, ut Capra laeuo
fixa umero clare sustollitur, ipsius autem
fine manus paruas Haedorum suspice flammas.

---

Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/AVIEN%7Carat%7C001.
