# Aratea 93-137

Avienus, Aratea, Lines 93-137. Latin.

Canonical: https://interlinea.aeterna-institute.org/library/latin/avienus/aratea/93
JSON: https://interlinea.aeterna-institute.org/api/v1/library/latin/avienus/aratea/93

Nec minus extremo dispar polus: Oceano pars
sublime erigitur, subit altera, mersa sub undas,
pars Erebum et nigri iacet haec ut conscia Ditis.
Hic Notus, horriferis Aquilonibus illa rigescunt,
ac teres in gemina stridit uertigine cardo.
Alter in obtutum facilis, latet alter et alto
deprimitur barathro. Sed qua sublimior axis
Tethyos undosae linquit cetosa fluenta,
contemplare sacras ut mundus subrigat Arctos.
sic astrum dici Cnidius dedit, Ausone easdem
uoce feras Vrsasque et Plaustra uocare solemus:
fabula namque ursas, species dat plaustra uideri.
Has pater omnipotens, nemorosi in ualle Lycaei
adsuetas duris quondam uenatibus, aethrae
intulit et rapto genetricis flore sacrauit.
Vel, ceu fama dehinc docet altera, Creta ubi fluctu
tunditur insanis late circumsona Cauris,
Iuppiter has idem, rerum memor indultarum
et custoditae referens pia dona salutis,
cum puer agrestis inter Curetas et inter
Dictaeae longum latuit crepitacula rupis,
scandere flammigerum uictor permisit Olympum,
nescia signa salis nocturnique inscia casus,
hospita et insanis Aquilonibus. Haud tamen ollis
ora uel aduerso sunt obuia pectora motu,
uersa Lycaoniis sed suspectatur in Vrsis
forma super, pariterque polo uestigia librant,
in spinam et flammis ardentia dorsa iacentes.
Sic Iouis altrices teretem prope cardinis axem
in caput inque umeros Helice Cynosuraque uersae
praescia uenturis dant semper signa procellis.
Namque Helice Graios, Tyrios Cynosura per altum
parua regit. Non ulla facem succenderit umquam
stella prior neque flammigeros eduxerit ortus
ante alia, immerso cum iam Titanius orbe
imbuit et tremulo Tartesia terga rubore,
Cresia quam flammas inter primordia noctis
maior agat uultusque sacros ostendat Olympo.
Illa licet paruo iaceat temone per aethram,
uerior infidum tamen est currentibus aequor.
Cardine nam toto cum uertitur, haud mora longos
pigra tenet gyros, neque, ceu molita parumper,
flectitur aut tardo cohibet cunctamina lapsu:
denique Sidoniis duce te, Cynosura, carinis
rectior undoso cursus sulcatur in aestu.

---

Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/AVIEN%7Carat%7C001.
