# Regula 36.40

Benedict, Regula, Chapter 36. Latin.

Canonical: https://interlinea.aeterna-institute.org/library/latin/benedict/regula/36.40
JSON: https://interlinea.aeterna-institute.org/api/v1/library/latin/benedict/regula/36.40

Sanis autem, et maxime juvenibus, tardius concedatur.] Haec fuit constans et sana sanctorum Patrum doctrina. S. Athanasius (Syntag. doctrin. ad Μοn., etc): « Si morbus exigat, inquit, una aut altera vice lavationem adhibe; sospes autem balneo non indiges. » S. Hieronymus (Epist. 4): « Balnearum fomenta non quaeret, qui calorem corporis jejuniorum cupit frigore exstinguere. » S. Isidorus agens de monachis (Lib. ii, de Offic. eccles., cap. 15): « Lavacris utantur nunquam delectatione corporis, sed raro propter necessitatem languoris; » et in Regula (Cap. 20): « Lavacra nulli monacho adeunda studio lavandi corporis, nisi tantummodo pro necessitate languoris. » S. Caesarius in Regula ad sanctimoniales (Cap. 29): « Lavacra cujus infirmitas exposcit minime denegentur.... si autem nulla infirmitate compelletur, cupiditati suae non praebeatur assensus. » S. Leander (De Instit. virg., c. 10): « Balneo non pro studio vel nitore utaris corporis, sed tantum pro remedio salutis. Utere, inquam, lavacro quando poscit infirmitas, non quando suaserit voluntas.... Non te illiciat lavare saepius carnis voluptas, sed infirmitatis imperet necessitas. » S. Petrus Damiani (Opusc. 15, cap. 18): « Balneis, si fuerint incolumes, non utuntur. » Et quidem ea de re laudant S. Tattonem, in Vita S. Paldonis, num. 17; S. Pardulfum, in ejus Vita, num. 5; S. Opportunam abbatissam, in ejus Vita, num. 8. saec. iii; et S. Popponem, in ejus item Vita, num. 59, apud Boll., 25 Januar.

---

Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml.
