# Regula 55.697.203-231

Benedict, Regula, 55.697.203 to 55.697.231. Latin.

Canonical: https://interlinea.aeterna-institute.org/library/latin/benedict/regula/55.697.203
JSON: https://interlinea.aeterna-institute.org/api/v1/library/latin/benedict/regula/55.697.203

» Simile aliquid habet Nicolaus de Fractura. De Cisterciensibus vide Julianum Varnerium loco supra citato. Bursfeldenses scapulare suum ita describunt (Dist. 3, cap. 21): « Pro opere vero manuali, et, ex apostolico indulto, etiam in ministerio divino sub sacris vestibus etiam scapulari utimur; cujus caputium eidem assutum retro et ad utrumque latus unam palmam habebit, minus in extenso quam cuculla. Pars vero scapularis ante et retro dependens latitudinis mediae ulnae sit, vel quasi, longitudo usque ad talos. » Cassinenses vero praescribunt (Declar. Cass., cap. 55), ut « scapularia monachorum sint longa super tunicam per dimidium quartae, lataque secundum latitudinem rasciae. Scapularia novitiorum sint stricta et curta, et protendantur usque ad genua. » Scapulare S. P. Benedictus indulsit propter opera loco cucullae, quam tunc deponebant, unde et cucullae nomen ei inditum est, sive quia cucullae vices teneret, sive propter caputium: hinc de scapulari locum hunc ex Vita S. Benedicti Anianensis (Saec. iv Ben.) merito intellexeris: « In habitu quoque dissimiles fecerat multorum consuetudo; siquidem nonnullis usque ad talos cucullae pendebant, quamobrem vir Dei uniformem cunctis tenendum monachis instituit modum, ut non amplius a duobus cubitis excederet mensura, vel usque ad genua pertingere posset; » id quod confirmat Smaragdus ad hunc locum sic scribens: « Quod vero ille dicit scapulare propter opera, hoc nos modo dicimus cucullam. » Postea vero usus invaluit, ut non solum ad opera, sed omni etiam tempore scapulare deferretur; rarius cuculla, nec nisi ad divina officia et alia hujusmodi exercitia. Nullam hic S. legislator zonae mentionem facit; cujus tamen usum supra, cap. 22, praescripsit, decernens ut vestiti dormiant monachi, et cincti cingulis aut funibus. S. Cuthbertum zona linea usum fuisse constat ex Beda in ejus Vita, cap. 23; sed S. Fulgentius Ruspensis episcopus « pelliceo cingulo tanquam monachus utebatur, » uti legimus in ejus Vita.

---

Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml.
