Latin
61.808.60 to 61.808.75
Benedict, Regula 61.808.60-75
Unproofread scanNot analysed yet
Tertio suspectam habeo levitatem qua saepe id quod facile volumus antequam probemus, experti jam nolumus, uno prope momento idipsum et cupientes et respuentes, tam leviter quam et irrationabiliter. Quales utique non paucos frequenter experimur qui una vix hora in una voluntate durantes, aura levitatis impulsi, vagi et instabiles hac et illac velut ebrii nutant, mutantque pro experimento judicium, imo sine judicio fluctuantes et tumultuantes tot de se consilia praesumunt quot loca revisunt, semper quod non habent cupientes, et quod habent fastidientes. »Et alibi ad abbatem S. Nicasii scribens (Epist. 32): «Fratrem Hugonem de Lausanna ore tuo et nostro spiritui commonemus, non omni spiritui credere, et ne cito moveatur certa pro incertis deserere; sciens diabolum soli semper perseverantiae insidiari, quam solam novit coronari, tutiusque esse in ea vocatione qua vocatus est simpliciter perseverare, quam sub specie quasi melioris boni, id quidem, quod jam coepit dimittere, nec ad id quod praesumit, fortassis sufficere. »Item alibi (Epist. 86) ad Guillelmum abbatem S. Theoderici, qui ardentissimo flagrabat desiderio abjiciendi onus pastorale, privatamque in Clarevallensi monasterio vitam agendi: «Tene itaque, meo consilio, quod tenes, mane in quo es, et stude prodesse quibus praees: nec praeesse refuge, dum prodesse potes; quia vae quidem tibi, si praees, et non prodes; sed vae gravius si quia praeesse metuis, prodesse refugis. »Denique ad abbatem Praemonstratensem (Epist. 253): «Inveni ego in claustris vestris, qui ad verbum praedicationis nostrae compuncti et conversi, ad nos venire disposuerant, cum ecce sollicitantibus vestris, retrahentes pedem recepti et retenti sunt in ordine et habitu vestro. Postmodum vero remordente eos conscientia exire voluerunt, et, ni fallor, exissent, nisi nostro firmarentur, non assensu tantum, sed et hortatu. »Et certe solebat S. doctor ex alienis monasteriis ad se venire cupientes monachos repellere, venientes remittere, ut ex hac epistola, et ex 67 et 293 patet.