# Regula prologus.28.47-65

Benedict, Regula, prologus.28.47 to prologus.28.65. Latin.

Canonical: https://interlinea.aeterna-institute.org/library/latin/benedict/regula/prologus.28.47
JSON: https://interlinea.aeterna-institute.org/api/v1/library/latin/benedict/regula/prologus.28.47

dum datur spatium luge, dum licentia est poeniteas; festina dum potes, dum anima versetur in corpore; dum adhuc vivis futurum remedium require tibi, priusquam te profundum absorbeat pelagus, priusquam le malignus rapiat infernus, ubi nulla datur indulgentia, ubi nullus regreditur ad veniam. » Et haec omnia per hanc lucis vitam vacat implere.] Lucis vita est vita monastica, quam hic intelligi a S. Patre Benedicto facile mihi persuaserim, nam et hic monachos alloquitur. Huic vitae opponitur vita saecularis, mera nox, de qua S. Bernardus suos alloquens (Serm. 5 in vigil. Nat. Pomini): « Annon etiam cuiquam nostrum caliginosa nox erat, cum tanquam sine Deo in hoc saeculo viveremus, cum ambularemus post concupiscentias nostras, cum sectaremur carnis illecebras, cum obtemperaremus desideriis saecularibus, cum exhiberemus membra nostra arma iniquitatis peccato, cum serviremus iniquitati ad iniquitatem, in quibus nunc merito erubescimus tanquam operibus tenebrarum? » Currendum et agendum modo quod in perpetuum nobis expediat.] Currendum, inquit, et agendum modo, id est nunc, ut si juvenis sis, ad extremum vitae terminum, quo prae nimiae senectutis languore currere vix vacat, poenitentiam non differas: modo, ut si senex, saltem vel extrema vitae tempora Deo Optimo Maximo etiam vel minima remuneranti devoveas. Praeclare omnino Petrus Venerabilis (Lib. v Ep.): « Relinquite, inquit, terrena antequam vos ipsa relinquant; et si primas partes hostiae, hoc est vitae vestrae, Deo noluistis offerre, saltem caudam, id est finem dierum vestrorum, ipsi devote efferte. » Modo ergo si senex sis; sed modo etiam si juvenis, ut ulterius cursum non differas, ne forte morte praeoccupatus, quod modo licet, et potes, cum optaveris implere non vacet. « Praeveniendus est, inquit S. Augustinus (Serm. 154, in append.), seu quivis alius, dies qui praevenire consuevit: ipse se seducit et de m rte sua ludit, qui hoc cogitat: Potest mihi indulgentia temporis subvenire;

---

Benedict, Regula, ed. J.-P. Migne. Text: Open Greek and Latin, Patrologia Latina (University of Leipzig), CC BY-SA 4.0. Changes: notes, column numbers and editors' prefaces removed, line-end hyphens joined and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/OpenGreekAndLatin/patrologia_latina-dev/blob/8c651f859f821f0868755596f1a513946ca25350/data/tmp1085/tmp1085/tmp1085.tmp1085.opp-lat1.xml.
