urn:cts:latinLit:phi0474.phi055.perseus-lat2, Book 2

Quem ad modum officia ducerentur ab honestate, Marce fili, atque ab omni genere virtutis, satis explicatum arbitror libro superiore. Sequitur, ut haec officiorum genera persequar, quae pertinent ad vitae cultum et ad earum rerum, quibus utuntur homines, facultatem, ad opes, ad copias . De quibus dicere aggrediar, si pauca prius de instituto ac de iudicio meo dixero.