urn:cts:latinLit:phi0474.phi057.perseus-lat1, Book 1, Letter 18

est autem C. Herennius quidam tribunus pl. ,quem tu fortasse ne nosti quidem; tametsi potes nosse, tribulis enim tuus est et Sextus pater eius nummos vobis dividere solebat. is ad plebem P. Clodium traducit idemque fert ut universus populus in campo Martio suffragium de re Clodi ferat. hunc ego accepi in senatu, ut soleo, sed nihil est illo homine lentius.