urn:cts:latinLit:phi0474.phi056.perseus-lat2, Book 7, Letter 22

inluseras heri inter scyphos, quod dixeram controversiam esse, possetne heres, quod furtum antea factum esset, furti recte agere. itaque etsi domum bene potus seroque redieram, tamen id caput, ubi haec controversia est, notavi et descriptum tibi misi, ut scires id, quod tu neminem sensisse dicebas, Sex. Aelium, M’. Manilium, M. Brutum sensisse. ego tamen Scaevolae et Testae adsentior.