urn:cts:latinLit:phi0474.phi056.perseus-lat2, Book 9, Letter 26

an tu id melius, qui etiam philosophum inriseris, qui cum ille, si quis quid quaereret, dixisset, cenam te quaerere a mane dixeris? ille baro te putabat quaesiturum, unum caelum esset an innumerabilia. quid ad te? at hercule †cena non quid ad te tibi praesertim. sic igitur vivitur: cotidie aliquid legitur aut scribitur; dein ne amicis nihil tribuamus, epulamur una non modo non contra legem, si ulla nunc lex est, sed etiam intra legem et quidem aliquanto. qua re nihil est quod adventum nostrum extimescas; non multi cibi hospitem accipies, multi ioci.