urn:cts:latinLit:phi0474.phi037.perseus-lat2, Book 2

Tum Antonius ego vero ita fecissem, inquit nisi interdum in hoc Crasso paulum inviderem; nam esse quamvis facetum atque salsum non nimis est per se ipsum invidendum; sed cum omnium sit venustissimus et urbanissimus, omnium gravissimum et severissimum et esse et videri, quod isti contigit uni, mihi vix ferendum videbatur.