Latin
Lines 1.96-1.141
Claudian, Panegyricus dictus Probino et Olybrio consulibus 1.96-141
Not analysed yet
hic patrius Mavortis amor fetusque notantur
Romulei; plus amnis inest et belua nutrix;
electro Tiberis, pueri formantur in auro;
fingunt aera lupam; Mavors adamante coruscat.
Iam simul emissis rapido velocior Euro
fertur equis; strident Zephyri cursuque rotarum
saucia dividuis clarescunt nubila sulcis.
nec traxere moras, sed lapsu protinus uno,
quem poscunt, tetigere locum: qua fine sub imo
angustant aditum curvis anfractibus Alpes
claustraque congestis scopulis durissima tendunt,
non alia reseranda manu, sed pervia tantum
Augusto geminisque fidem mentita tyrannis.
semirutae turres avulsaque moenia fumant;
crescunt in cumulum strages vallemque profundam
aequavere iugis; stagnant inmersa cruore
corpora; turbantur permixto funere manes.
Haud procul exhausto laetus certamine victor
caespite gramineo consederat arbore fultus
adclines umeros; dominum gavisa coronat
terra suum, surguntque toris maioribus herbae.
sudor adhuc per membra calet creberque recurrit
halitus et placidi radiant in casside vultus:
qualis letifera populatus caede Gelonos
procubat horrendus Getico Gradivus in arvo;
exuvias Bellona levat, Bellona tepentes
pulvere solvit equos, inmensaque cornus in hastam
porrigitur tremulisque ferit splendoribus Hebrum.
Ut stetit ante ducem discussas Roma per auras,
conscia ter sonuit rupes et inhorruit atrum
maiestate nemus. prior hic: o numen amicum
dux ait “et legum genetrix longeque regendo
circumfusa polo consors ac dicta Tonantis,
die agedum, quae causa viae? cur deseris arces
Ausonias caelumque tuum? die, maxima rerum!
non ego vel Libycos cessem tolerare labores
Sarmaticosve pati medio sub frigore Cauros,
si tu, Roma, velis; pro te quascumque per oras
ibimus et nulla sub tempestate timentes
solstitio Meroen, bruma temptabimus Histrum,”
Tum regina refert: “non me latet, indite rector,
quod tua pro Latio victricia castra laborant
nec quod servitium rursus Furiaeque rebelles
edomitae paribus sub te cecidere triumphis.
sed precor hoc donum cum libertate recenti
adicias, si vera manet reverentia nostri.