Latin
Lines 45-77
Columbanus, Versus ad Sethum 45-77
Not analysed yet
Non misera capitur caecaque cupidine rerum,
Nec maiora cupit quam quae natura reposcit;
Non lucri cupidus nummis marsuppia replet,
Nec molles cumulat tinearum ad pabula uestes;
Pascere non pingui procurat fruge cauallos,
Nec trepido tales uoluit(==VOLVIT) sub pectore curas,
Ne subitis pereat collecta pecunia flammis,
Aut fracta nummos rapiat fur improbus arca.
Viuitur argento sine iam, sine uiuitur auro.
Nudi nascuntur, nudos quoque terra receptat.
Diuitibus nigri reserantur limina Ditis,
Pauperibusque piis caelestia regna patescunt.
Temnere diuitias monuit saluator auaros;
Quisquis amat Christum, sequitur uestigia Christi;
Nam breuis et fragilis moriturae gloria carnis
Quicquid habet, rapidi uelox fuga temporis aufert.
Pulchre ueridici cecinit uox talia uatis,
"Tempora dinumerans aeui uitaeque caducae,
Omnia tempus agit, cum tempore cuncta trahuntur.
Alternant elementa uices et tempora mutant;
Accipiunt augmenta dies noctesque uicissim.
Tempora sunt florum, retinet sua tempora messis;
Sic iterum spisso uestitur gramine campus.
Tempora gaudendi, sunt tempora certa dolendi;
Tempora sunt uitae, sunt tristia tempora mortis.
Omnia dat, tollit minuitque uolatile tempus.
Ver, aestas, autumnus, hiems, redit annus in annum;
Omnia cum redeunt, homini sua non redit aetas."
Haec sapiens omni semper reminiscitur hora,
Atque domum luctus epulis praeponit opimis.
Vltima nunc humili concludam uerba precatu:
Sis memor ipse mei, uersus cum legeris istos,
Tempora sic habeas optatae longa senectae