Latin
Lines 1.47-1.92
Contemporary, Alexander Smarius 1.47-92
Not analysed yet
Quam mea flammiferis haeserunt labra labellis!
Qualiter increpuit muta per ora iocus!
Qualis anhela fuit, suspiria qualia duxit:
vertit in elicitas mox sua iussa preces.
Sic memor officii calida sub veste manebam
impiger et placito munere dignus eram.
III Morae Encomium
Desine; (vix potui) paulatim (dicere) perge,
perge, sed ante Venus quam venit, adde moram.
Dum licet inter nos Venerem compescere, nobis
corpus utrumque novo ferveat igne diu.
Lux mea, cessemus: patitur si frena voluptas
quamvis exiguo tempore, maior erit.
Perge, resume viam mecum, mea vita, supino -
desine, namque morae, sentio, tempus adest.
Pallas ut erupit patrium caput, addidit ipsam
se dea discesso grata dolore deis.
At nos cum Venus exanimos spumosa reliquit,
nil superest nobis, nam semel orta perit.
Ergo, ne locus effugii sit, desine motum -
perge, Venus trepidum neve relaxet opus.
Ei mihi, mox nimium numen nos vincet anhelos,
mox poterit praeceps rumpere frena furor:
ultima nunc manibus iungamus basia nexis,
donec in exitium nos violenta trahit.
IV Vincula Amoris
'Quid cupidae mihi, lente, parum blandiris amicae?'
Ausa mihi es largo dicere, vita, viro.
Iam te solliciti fallunt, ingrata, labores?
Ergo disce novos nunc in amore modos.
Considam: constringe meos post terga lacertos,
ne moveam et sedi crura tenenda liga.
Altera me Siren cieas lasciva loquendo,
quid valeant vatem verba, magistra, doce.
Aspice iam trepidum, propius gradiaris anhelum,
ebrius olfaciam corpus ut omne tuum.
Basia dein simules ardenti pressa datura,
proxima sed remove labra repente labris.
Non magis esuriens fallacibus ille sub uvis
stabat et intactas Tantalus inter aquas.
Talia si sat passus ero sine fine per horas,
vincula si tandem solveris arta mea,
lux mea, crede mihi: tunc mox satiata dolebis
me querulam nimium saepe vocasse pigrum,
languida tunc rauca poteris vix voce precari:
'Blanditias nimias desine, parce, fuge!'
V Rara Ratio
Blanda loqui Lalage si vult, balbutit: amandum
quod decus esse puto, dedecus illa vocat.