Latin
Lines 5.306-5.329
Dracontius, Romulea 5.306-329
Not analysed yet
Si ratio te nulla mouet, si mente cruenta
humana pietate cares, imitare leones
quos feritas generosa iuuat :super arma tenentes
ingruere fremitusque dare procul ore cruento
nobilis ira solet, subiectis parcere gaudent
et praedam rabies contempsit fulua iacentem.
Gramina non tangunt, feriunt sed fulmina quercus.
Nunquam taurus iners lassa ceruice Tonanti
uictima fessa datur, sed iam quis grandia surgunt
ingentes per colla tori, quos fronte superba
pascua cornigeros armant in bella iuuencos.
Hostia uictorem funestat languida, pauper
si mactatus erit. Sed sint tua sacra coronae,
sint hederae, lauri, quercus, et palma triumphi,
sint clipei, galeae, contus, lorica tropaeum.
Accipe tura potens deus ut Tirynthius aris,
<ut> Thebis partus, magnus cum Castore Pollux
semidei post fata uigent: his quintus adesto
uirtutis ratione, fide, pietate, uigore,
possessure polos, scandens qua lacteus axis
uertitur, aetherii qua se dat circulus orbis
lunarisque globus qua uoluitur axe tepenti
aut certe qua Phoebus agit super astra iugales:
sidera sic capies, poteris sic astra mereri".