# Epitome Rerum Romanorum 1.7.13.12

Florus, Epitome Rerum Romanorum, Book 1, Topic 7, Chapter 13. Latin.

Canonical: https://interlinea.aeterna-institute.org/library/latin/florus/epitome-rerum-romanorum/1.7.13.12

Virgines simul ex sacerdotio Vestae nudo pede fugientia sacra comitantur. Tamen excepisse fugientis unus ex plebe fertur Albinius, qui depositis uxore et liberis virgines in plaustrum recepit. Adeo tunc quoque in ultimis religio publica privatis adfectibus antecellebat. Iuventus vero, quam satis constat vix mille hominum fuisse, duce Manlio arcem Capitolini montis insedit, obtestata ipsum quasi praesentem Iovem, ut quem ad modum ipsi ad defendendum templum concurrissent, ita ille virtutem eorum numine suo tueretur.

---

Florus, Epitome Rerum Romanorum, ed. Edward Seymour Forster, John C. Rolfe. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi1242/phi001/phi1242.phi001.perseus-lat1.xml.