# Historia de Regibus Gothorum, Wandalorum et Suevorum 1.31

Isidore of Seville, Historia de Regibus Gothorum, Wandalorum et Suevorum, HISTORIA DE REGIBUS GOTHORUM, WANDALORUM ET SUEVORUM. Latin.

Canonical: https://interlinea.aeterna-institute.org/library/latin/isidore-of-seville/historia-de-regibus-gothorum-wandalorum-et-suevorum/1.31

31 Aera CDXCI, anno II imperii Marciani, Theudericus, post fraternam necem, in regnum succedens, imperavit annis XIII, qui pro eo quod imperatori Avito sumendi imperialis fastigii cum Gallis auxilium praebuisset, ab Aquitania in Hispaniam, cum ingenti multitudine exercitus, et cum licentia ejusdem Aviti imperatoris, ingreditur, anno regni quinto. Cui cum magna copia rex Suevorum Recchiarius occurrens, duodecimo ab Asturicensis urbis milliario, apud fluvium qui Urbicus appellatur, inito mox certamine, superatus est, caesis Suevorum agminibus, aliquantis captis, plurimisque fugatis. Ipse postremo rex telo saucius fugit, praesidioque suorum carens, ad locum Portucale capitur, regique Theuderico vivus offertur.

---

Isidore of Seville, HISTORIA DE REGIBUS GOTHORUM, WANDALORUM ET SUEVORUM. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/isidore.html.