Latin
Book 1, lines 1.1.1527-1.1.1538
Justinian, Codex 1.1.1527-1538
Not analysed yet
CJ. 1. 55. 9. 1: Imperatores Honorius, Theodosius
Illud etiam fieri permittimus, ut, si provincialibus nostris contestari iniurias seu laesiones suas cupientibus actorum confectio a defensoribus denegetur, licentia eis tribuatur querellae propriae libellum conscriptum eo tenore, quo fuerat contestandum, in frequentioribus civitatum locis proponendi conveniendique scribas, tabularios et cetera officia publica commonenda, per quae libellum colligi oportebit atque invitis supra memoratis personis sub actorum confectione ingerendi, quorum quaestione fides possit inquiri: qua probata in eos, quos gestorum petitam confectionem negasse constiterit, vigor iudiciarius exseratur. <a 409 d. xii k. febr. ravennae honorio viii et theodosio iii aa. Conss. >
CJ. 1. 55. 10: Imperatores Theodosius, Valentinianus
Nulli defensorum licere decernimus, si de publica sollicitudine voluerit se liberare, nisi divinos adfatus intimaverit tuae sublimitatis iudicio, triginta librarum auri poenam tam moderatoribus provinciarum quam ceteris iudicibus vel temeratoribus sacri nostri oraculi subituris, si neglecta fuerit auctoritas principalis. *theodos. et valentin. aa. cyro pp. *<a 441 d. xv k. sept. constantinopoli cyro vc. cons. >
CJ. 1. 55. 11: Imperator Anastasius
Iubemus eos tantummodo ad defensorum curam peragendam ordinari, qui sacrosanctis orthodoxae religionis imbuti mysteriis hoc imprimis sub gestorum testificatione ,praesente quoque religiosissimo fidei orthodoxae antistite, per depositiones cum sacramenti religione celebrandas patefecerint. ita enim eos praecipimus ordinari, ut reverentissimorum episcoporum nec non clericorum et honoratorum ac possessorum et curialium decreto constituantur. *anastas. a. eustathio pp. *<a 505 d. xiii k. mai. sabiniano et theodoro conss. >
CJ. 1. 56. 0. De magistratibus municipalibus.
CJ. 1. 56. 1: Imperator Constantinus
Decuriones ad magistratum vel exactionem annonarum ante tres menses vel amplius nominari debent, ut, si querimonia eorum iusta videatur, sine impedimento in absolvendi locum alius subrogetur. *const. a. ad florentium pp. *<a 323 d. id. april. constantinopoli severo et rufino conss. >
CJ. 1. 56. 2: Imperatores Valentinianus, Valens
Magistratus conficiendorum actorum habeant potestatem. *valentin. et valens aa. ad germanium. *<a 366 d. xiii k. ian. gratiano np. et dagalaifo conss. >
CJ. 1. 57. 0. De officio iuridici alexandriae.