Latin
Book 4, lines 4.1.1178-4.1.1191
Justinian, Codex 4.1.1178-1191
Not analysed yet
CJ. 4. 44. 13: Imperatores Diocletianus, Maximianus
Si maior annis viginti quinque fundum distraxisti, propter hoc solum, quod ementi, ne compararet, socer tuus denuntiavit, emptionem a te rescindi bona fides non patitur. *diocl. et maxim. aa. et cc. aurelio nicae decaria. *<>
CJ. 4. 44. 14: Imperatores Diocletianus, Maximianus
Ea condicione distractis praediis, ut quod rei publicae debebatur qui comparavit restitueret, venditor a se celebrata solutione quanti interest experiri potest, non ex eo, quod emptor non satis conventioni fecit, contractus irritus constituitur. *diocl. et maxim. aa. et cc. aurelio basilidae mil. *<a 294 s. xv k. ian. nicomediae cc. conss. >
CJ. 4. 44. 15: Imperatores Gratianus, Valentinianus, Theodosius
Quisquis maior aetate praedia etiam procul posita distraxerit, paulo vilioris pretii nomine repetitionis rei venditae copiam minime consequatur. neque inanibus immorari sinatur obiectis, ut vires sibimet locorum causetur incognitas, qui familiaris rei scire vires vel merita atque emolumenta debuerat. *grat. valentin. et theodos. aaa. ad hypatium pp. *<a 383 d. vi non. mai. mediolani merobaude ii et saturnino conss. >
CJ. 4. 44. 16pr. : Imperatores Valentinianus, Theodosius, Arcadius
Si quos debitorum mole depressos necessitas publicae rationis adstringat proprias distrahere facultates, rei qualitas et redituum quantitas aestimetur nec sub nomine subhastationis publicae locus fraudibus relinquatur et possessionibus viliore distractis plus exactor ex gratia quam debitor ex pretio consequatur. *valentin. theodos. et arcad. aaa. ad magnillum vic. africae. *<a 392 d. xiii k. iul. aquileiae. acc. id. ian. hadrumeti post consulatum tatiani et symmachi vv. cc. >
CJ. 4. 44. 16. 1: Imperatores Valentinianus, Theodosius, Arcadius
Hi postremo sub empti titulo perpetuo dominii iure potiantur, qui tantum adnumeraverint fisco, quantum exegerit utilitas privatorum. etenim periniquum est, ut alienis bonis sub gratiosa auctione distractis parum accedat publico nomini, cum totum pereat debitori. <a 392 d. xiii k. iul. aquileiae. acc. id. ian. hadrumeti post consulatum tatiani et symmachi vv. cc. >
CJ. 4. 44. 17: Imperatores Arcadius, Honorius
Hi, qui imposita munera civitatum fuga destituunt et ineundos furtim existimant esse contractus, intellegant sibi nihil haec profutura esse commenta et pretio emptorem fugae conscium multandum esse, quod dederit. *arcad. et honor. aa. messalae pp. *<a 399 d. xii k. sept. theodoro cons. >
CJ. 4. 44. 18: Imperatores Arcadius, Honorius, Theodosius
Vestium et argenti seu mancipiorum coemendorum, si quando a privatis nostris ea contigerit venumdari, palatini sciant sibi copiam denegatam: poena in eos amissionis pretii exercenda. *arcad. honor. et theodos. aaa. nestorio com. rer. privat. *<a a. 402 vel 406 d. iii k. ian. r. arcadio. . . . >