Latin
Book 4, lines 4.1.1555-4.1.1570
Justinian, Codex 4.1.1555-1570
Not analysed yet
CJ. 4. 65. 20: Imperatores Diocletianus, Maximianus
Qui rem propriam conduxit existimans alienam, dominium non transfert, sed inefficacem conductionis contractum facit. *diocl. et maxim. aa. et cc. aurelio carpophoro. *<a 293 s. iii k. mart. heracleae aa. conss. >
CJ. 4. 65. 21: Imperatores Diocletianus, Maximianus
Si olei certa ponderatione fructus anni locasti, de contractu bonae fidei habito propter hoc solum, quod alter maiorem obtulit ponderationem, recedi non oportet. *diocl. et maxim. aa. et cc. antoniae. *<a 293 d. viii id. oct. sirmi aa. conss. >
CJ. 4. 65. 22: Imperatores Diocletianus, Maximianus
Si hi, contra quos supplicas, facta locatione temporis certi suas tibi locaverint operas, quatenus bona fides patitur, causa cognita competens iudex conventionem servari iubebit. *diocl. et maxim. aa. et cc. papiniano. *<a 293 >
CJ. 4. 65. 23: Imperatores Diocletianus, Maximianus
Ad probationem rei propriae sive defensionem non sufficit locatio ei facta, qui post de dominio coeperit contendere, cum nescientia dominii proprii et errantis nullum habeat consensum :sed ex eventu, si victus fuerit, contractus locationis non constitisse magis declaratur. nemo enim sibi iure possessionem mutare potest. *diocl. et maxim. aa. et cc. aurelio prisco. *<a 293 >
CJ. 4. 65. 24: Imperatores Diocletianus, Maximianus
Contractus locationis conductionisque non intervenientibus etiam instrumentis ratus habeatur :secundum quod heredes conductoris, etsi non intervenerint instrumenta, non uxorem convenire debes. sane de posteriore tempore, quo conductricem ipsam proponis fuisse, adesse fidem precibus tuis probans pensiones integras ab ea pete. *diocl. et maxim. aa. et cc. aurelio antonino. *<a 293 pp. viii k. ian aa. conss. >
CJ. 4. 65. 25: Imperatores Diocletianus, Maximianus
Si quis conductionis titulo agrum vel aliam quamcumque rem accepit ; possessionem debet prius restituere et tunc de proprietate litigare. *diocl. et maxim. aa. et cc. aurelio epagatho. *<a 293 iii k. ian. sirmi aa. conss. >
CJ. 4. 65. 26: Imperatores Diocletianus, Maximianus
Si conductionis implestis fidem, eius rei gratia factum instrumentum evanuit. quod si quid vestrum in fundo fuit vel vi direptum est, hoc restitui vobis praeses provinciae iubebit. *diocl. et maxim. aa. et cc. aurelio opilioni et hermio. *<a 294 d. iii k. mai. cc. conss. >
CJ. 4. 65. 27: Imperatores Diocletianus, Maximianus
Si tibi quae pro colonis conducti praedii prorogasti dominus fundi stipulanti dare spopondit, competens iudex reddi tibi iubebit. nam si conventio placiti fine stetit, ex nudo pacto perspicis actionem iure nostro nasci non potuisse. *diocl. et maxim. aa. et cc. maximiano agopodi. *<a 294 >