Latin
Book 5, lines 5.1.1057-5.1.1070
Justinian, Codex 5.1.1057-1070
Not analysed yet
CJ. 5. 28. 1: Imperatores Severus, Antoninus
Quem dicis tibi tutorem testamento patronae datum, si administrationi se non miscuit, nulla actione tibi tenetur: neque enim iure datus tutor fuit. quod si administravit sponte res tuas, experiri adversus eum actione negotiorum gestorum potes. *sev. et ant. aa. speratae. *<a 207 pp. xvii k. aug. apro et maximo conss. >
CJ. 5. 28. 2: Imperator Antoninus
Etsi a patre tuo testamento iure tutor tibi datus eo tempore, quo heres extitisti, in rebus humanis fuit, tamen codicillis alius tutor recte datus est et uterque propter voluntatem testatoris tutor erit, nisi testamento datum pater alium codicillis dando reprobaverit: tunc enim posterior solus tutor erit. *ant. a. sabiniano. *<a 212 pp. id. april. duobus aspris conss. >
CJ. 5. 28. 3: Imperator Alexander Severus
Si tutores testamento vobis dati sunt, quamquam unus vestrum suae aetatis factus sit, id est pupillarem aetatem excesserit, tutela tamen vestra ad eum non pertinet. *alex. a. gorgiae. *<a 223 pp. v k. ian. maximo ii et aeliano conss. >
CJ. 5. 28. 4: Imperator Alexander Severus
Mater testamento filiis tutores dare non potest, nisi eos heredes instituerit. quando autem eos heredes non instituerit, solet ex voluntate defunctae datus tutor a praesidibus confirmari. nullo vero ex his interveniente si res pupillares qui dati sunt administraverint, protutelae actione tenentur. *alex. a. feliciano. *<a 224 pp. vii k. iun. iuliano et crispino conss. >
CJ. 5. 28. 5: Imperatores valer. ,gallien.
Si pupillorum pater alienum servum, de quo postulas, et tutorem esse voluit et liberum, ante tamen tutore alio pupillis dato, redimi et manumitti hunc apud praesidem et curatorem adiungi oportet. *valer. et gallien. aa. daphno. *<a 260 pp. iii k. mart. saeculare ii et donato conss. >
CJ. 5. 28. 6: Imperatores Diocletianus, Maximianus
Si tibi pater avunculum testamento recte tutorem dedit nec is excusatus est, eum tutelae iudicio tam administratis quam neglectis, cum administrari deberent, apud competentem iudicem conveni secundum bonam fidem tibi satisfacere iussurum. *diocl. et maxim. aa. et cc. domnae. *<a 294 s. non. april. sirmi cc. conss. >
CJ. 5. 28. 7: Imperatores Diocletianus, Maximianus
Tutela contra tutorem mota, quem testamento patris (si in eius fuisti potestate) datum proponis, reddi tibi si quid debetur competens iudex aditus iubebit. curatorem enim inutiliter in testamento dari non ambigitur. *diocl. et maxim. aa. et cc. tryphaenae. *<a 294 d. xvii k. mai. sirmi cc. conss. >