Latin
Book 5, lines 5.1.1143-5.1.1160
Justinian, Codex 5.1.1143-1160
Not analysed yet
CJ. 5. 34. 1: Imperator Alexander Severus
Cum tibi in ea aetate constituto, ut, si de statu constaret, per tutores sive curatores negotia tua administrari deberent, libertatis controversiam fieri adleges, non oportuit impediri, quo magis liberali causa ordinata, quia interim pro libero habebaris, curator tibi daretur, per quem defendi causa tua potest. *alex. a. ambibulo. *<a 222 pp. k. nov. alexandro a. cons. >
CJ. 5. 34. 2: Imperator Alexander Severus
Maritus etsi rebus uxoris suae debeat adfectionem, tamen curator ei creari non potest. *alex. a. artemisiae. *<a 225 pp. k. iul. fusco ii et dextro conss. >
CJ. 5. 34. 3: Imperator Philippus
Luminibus captum curatorem habere falso tibi persuasum est. *philipp. a. dolenti. *<a 244 pp. xiii k. aug. peregrino et aemiliano conss. >
CJ. 5. 34. 4: Imperator Philippus
Armatae militae muneribus occupatus neque si legitimus sit neque si ex testamento datus fuerit nec alio modo, etsi voluerit, tutor aut curator fieri potest: sed si errore ductus res administraverit, negotiorum gestorum actione convenitur. *philipp. a. emerito mil. *<a 244 pp. x k. aug. peregrino et aemiliano conss. >
CJ. 5. 34. 5: Imperatores Diocletianus, Maximianus
Neque a praeside alterius provinciae neque a magistratibus municipalibus tutorem ortum ex alia civitate nec domicilium ubi nominatur habentem iure dari posse ab eo, cuius iurisdictioni subiectus non est, certissimi iuris est: neque cessatio iniuncti perperam officii ad periculum eius pertinet. *diocl. et maxim. aa. et cc. aelianae. *<a 293 s. xii k. mai. aa. conss. >
CJ. 5. 34. 6: Imperatores Diocletianus, Maximianus
Quod dicis matrem filiis tutores nolle petere, super hac re adi praesidem provinciae, cum, si eam neglexisse perspexerit, etiam ipse magistratus dare tutores vel nomina mittere, ut ab ipso decreto tribui possint, iubere non prohibeatur. *diocl. et maxim. aa. Et cc. leontio. *<a 293 pp. prid. k. mai. aa. conss. >
CJ. 5. 34. 7: Imperatores Diocletianus, Maximianus
In servili condicione constitutum tutorem vel curatorem a praeside dari non posse nullam habet iuris dubitationem. *diocl. et maxim. aa. et cc. rufo. *<a 293 s. prid. non. iul. philippopoli aa. conss. >
CJ. 5. 34. 8: Imperatores Diocletianus, Maximianus
Creditorem debitoribus tutorem datum non tantum petitionem non amittere, sed etiam ipsum sibi posse solvere non ambigitur. *diocl. et maxim. aa. et cc. euelpisto. *<a 294 pp. v non. ian. cc. conss. >
CJ. 5. 34. 9: Imperatores Diocletianus, Maximianus
Si sororis tuae filiis, tutore legitimo patruo constituto nec ullo excusato privilegio, tutor datus es, cum habenti tutorem alium dari prohibeant iura, necessitatem administrationis ad eum pertinere nec te datione teneri non ambigitur. *diocl. et maxim. aa. et cc. maximiano. *<a 294 s. iii k. febr. sirmi cc. conss. >