Latin
Book 6, lines 6.1.312-6.1.332
Justinian, Codex 6.1.312-332
Not analysed yet
CJ. 6. 14. 0. Unde liberi.
CJ. 6. 14. 1: Imperatores Diocletianus, Maximianus
Si avus tuus relictis tribus emancipatis filiis decessit hique bonorum possessionem unde liberi acceperunt, pro portione heredes eos extitisse palam est. *diocl. et maxim. aa. sarpedoni. *<a 286 pp. Iiii non. Mart. Maximo ii et aquilino conss. >
CJ. 6. 14. 2: Imperatores Diocletianus, Maximianus
Ex testamento vel ab intestato existente filio vel nepote suo herede nemo potest intestato heres existere. *diocl. et maxim. aa. et cc. zosimo. *<a 293 d. Vii id. mai. aa. conss. >
CJ. 6. 14. 3: Imperator Constantius
Qui se patris post avum intestatum defuncti negat heredem, mortui avi paterni suscipere facultates non potest, maxime emancipatus, nisi per bonorum possessionem ad huiusmodi beneficium pervenerit. *constantius a. ad leontinum com. orientis. *<a 349 d. Viii id. april. limenio et catullino conss. >
CJ. 6. 15. 0. Unde legitimi et unde cognati.
CJ. 6. 15. 1: Imperator Alexander Severus
Consobrinorum tuorum intestatorum bona, si ad prioris necessitudinis neminem iure pertinuerunt, tuque eorum possessionem agnovisti, persequi non prohiberis. *alex. a. ulpio. *<a 224 d. Iiii id. Ian. iuliano et crispino conss. >
CJ. 6. 15. 2: Imperatores Diocletianus, Maximianus
Cum propiorem sobrinum, id est natum a consobrina, rebus humanis intestatum defunctum proponas, intellegis sine auxilio bonorum possessionis eius te successionem vindicare non posse. *diocl. et maxim. aa. sozioni. *<a 290 d. Vii k. Iun. Laodiceae aa. Conss. >
CJ. 6. 15. 3: Imperatores Diocletianus, Maximianus
Nepotibus avi materni pro virili portione etiam iure honorario successio defertur. *diocl. et maxim. aa. et cc. felici. *<a 293 d. Id.Oct. Sirmi aa conss. >
CJ. 6. 15. 4: Imperatores Diocletianus, Maximianus
Non hoc, an tenuerit quis res hereditarias nec ne, sine voluntate adquirendae sibi hereditatis, quaerendum est, sed an admisit hereditatem vel bonorum possessionem. *diocl. et maxim. aa. et cc. syriscae. *<a 293 d. Xi k. ian. sirmi aa. conss. >
CJ. 6. 15. 5: Imperatores Diocletianus, Maximianus
Certum est quidem cognationis iure citra admissionem neminem posse succedere: defuncti vero cognati succedere nolentes petere bonorum possessionem non urguentur. *diocl. et maxim. aa. et cc. platoni. *<a 294 d. Xii k. mart. sirmi cc. Conss. >
CJ. 6. 16. 0. De edicto successorio
CJ. 6. 16. 1: Imperator Alexander Severus
Si mater tua propter furorem suum patrui sui bonorum possessionem non accepit, tu filius eius ad eorundem bonorum patrui magni possessionem ex edicto, quo prioribus non petentibus sequentibus permittitur, admissus es. *alex. a. iulio. *<a 223 pp. Iiii id. Dec maximo ii et aeliano conss. >