Latin
Book 6, lines 6.1.982-6.1.995
Justinian, Codex 6.1.982-995
Not analysed yet
CJ. 6. 31. 1: Imperator Antoninus
Si paterna hereditate te abstinuisse constiterit et non ut heredem in domo, sed ut inquilinum vel custodem vel ex alia iusta ratione habitasse liquido fuerit probatum, ex persona patris conveniri te procurator meus prohibebit. *ant. a. muciano. *<a 214 pp. Id.Iul. Messala et sabino conss. >
CJ. 6. 31. 2: Imperator Antoninus
Si paterna hereditate abstinuisti, non ideo, quod a creditoribus fundos comparasti, si modo id bona fide fecisti, a posterioribus, qui sub isdem obligationibus pecuniam crediderint, iure conveniris. *ant. a. severo. *<a 215 pp. V k. Iul. Laeto ii et cereale conss. >
CJ. 6. 31. 3: Imperatores Diocletianus, Maximianus
Suus heres exceptione pacti, qui testamentum iniustum adseverans postea nihil se de paterna successione petiturum non ex causa donationis, sed transigendi animo in iure professus est, cum respuere quaesitam nequiret hereditatem et transactio nullo dato vel retento seu promisso minime procedat, submoveri non potest. *diocl. et maxim. aa. et cc. theodotiano. *<a 294 sine die et cc. conss. >
CJ. 6. 31. 4: Imperatores Diocletianus, Maximianus
Sicut maior quinque et viginti annis, antequam adeat, delatam repudians successionem post quaerere non potest, ita quaesitam renuntiando nihil agit, sed ius quod habuit retinet nec, quod confessos pro iudicatis habere placuit, ad vocem repudiantis hereditatem, sed ad certam quantitatem deberi confitentem pertinet. *diocl. et maxim. aa. et cc. modestino mil. *<a 293 s. V k. Ian. Sirmi aa. conss. >
CJ. 6. 31. 5: Imperatores Diocletianus, Maximianus
Pupillorum repudiatio delatae hereditatis sine tutore auctore facta nihil eis nocet. *diocl. et maxim. aa. et cc. claudianae. *<a 293 s. Prid. K.Ian. Sirmi aa. Conss. >
CJ. 6. 31. 6pr. : Imperator Justinianus
Si quis suus recusaverit paternam hereditatem, deinde maluerit eam adire, cum fuerat indistincte ei permissum, donec res paternae in eodem statu manent, hoc facere et post multum tempus licebat ei ad eandem hereditatem redire, hoc corrigentes sancimus, si quidem res iam venumdatae sint, ut nullus aditus ei ad hereditatem reservetur: quod et antiquitas observabat. *iust. a. iohanni pp. *<a 532 d. xv k. nov. constantinopoli post consulatum lampadii et orestis vv. cc. anno secundo. >
CJ. 6. 31. 6. 1: Imperator Justinianus
Sin autem res alienatae non sint, si quidem maior annis constitutus est et tempora restitutionis nulla ei supersint, intra trium annorum spatium tantummodo huiusmodi ei detur licentia. <a 532 d. xv k. nov. constantinopoli post consulatum lampadii et orestis vv. cc. anno secundo. >