# Digesta 9.1.167-196

Justinian, Digesta, Book 9, lines 9.1.167-9.1.196. Latin.

Canonical: https://interlinea.aeterna-institute.org/library/latin/justinian/digesta/9.1.167

Dig. 9.2.11.1
Ulpianus 18 ad ed.
Si alius tenuit, alius interemit, is qui tenuit, quasi causam mortis praebuit, in factum actione tenetur.
Dig. 9.2.11.2
Ulpianus 18 ad ed.
Sed si plures servum percusserint, utrum omnes quasi occiderint teneantur, videamus. et si quidem apparet cuius ictu perierit, ille quasi occiderit tenetur: quod si non apparet, omnes quasi occiderint teneri iulianus ait, et si cum uno agatur, ceteri non liberantur: nam ex lege aquilia quod alius praestitit, alium non relevat, cum sit poena.
Dig. 9.2.11.3
Ulpianus 18 ad ed.
Celsus scribit, si alius mortifero vulnere percusserit, alius postea exanimaverit, priorem quidem non teneri quasi occiderit, sed quasi vulneraverit, quia ex alio vulnere periit, posteriorem teneri, quia occidit. quod et Marcello videtur et est probabilius.
Dig. 9.2.11.4
Ulpianus 18 ad ed.
Si plures trabem deiecerint et hominem oppresserint, aeque veteribus placet omnes lege aquilia teneri.
Dig. 9.2.11.5
Ulpianus 18 ad ed.
Item cum eo, qui canem irritaverat et effecerat, ut aliquem morderet, quamvis eum non tenuit, proculus respondit aquiliae actionem esse: sed iulianus eum demum aquilia teneri ait, qui tenuit et effecit ut aliquem morderet: ceterum si non tenuit, in factum agendum.
Dig. 9.2.11.6
Ulpianus 18 ad ed.
Legis autem aquiliae actio ero competit, hoc est domino.
Dig. 9.2.11.7
Ulpianus 18 ad ed.
Si in eo homine, quem tibi redhibiturus essem, damnum iniuria datum esset, iulianus ait legis aquiliae actionem mihi competere meque, cum coepero redhibere, tibi restituturum.
Dig. 9.2.11.8
Ulpianus 18 ad ed.
Sed si servus bona fide alicui serviat, an ei competit aquiliae actio? et magis in factum actio erit danda.
Dig. 9.2.11.9
Ulpianus 18 ad ed.
Eum, cui vestimenta commodata sunt, non posse, si scissa fuerint, lege aquilia agere iulianus ait, sed domino eam competere.
Dig. 9.2.11.10
Ulpianus 18 ad ed.
An fructuarius vel usuarius legis aquiliae actionem haberet, iulianus tractat: et ego puto melius utile iudicium ex hac causa dandum.

---

Justinian, DIGESTA. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/justinian.html.