urn:cts:latinLit:phi0914.phi001.perseus-lat2, Part 2, Book 22, Chapter 6

insignemque armis et hostes summa vi petebant et tuebantur cives, donec Insuber eques —Ducario nomen erat —facie quoque noscitans consulem “En” inquit “hic est,” popularibus suis “qui legiones nostras cecidit agrosque et urbem est depopulatus! iam ego hanc victimam manibus peremptorum foede civium dabo.” subditisque calcaribus equo per confertissimam hostium turbam impetum facit, obtruncatoque prius armigero, qui se infesto venienti obviam obiecerat, consulem lancea transfixit; spoliare cupientem triarii obiectis scutis arcuere.