# Chronicon 1.80-85

Marcellinus Comes, Chronicon, 1.80 to 1.85. Latin.

Canonical: https://interlinea.aeterna-institute.org/library/latin/marcellinus-comes/chronicon-2/1.80

(A. C. 454.) Ind. VII, Aetio et Studio coss. Attila rex Hunnorum Europae orbator provinciae noctu mulieris manu cultroque confoditur. Quidam vero sanguinis rejectione necatum perhibent. Aetius patricius, magna Occidentalis reipublicae salus, et regis Attilae terror, a Valentiniano imp. cum Boetio amico in palatio trucidatur: atque cum ipso Hesperium cecidit regnum, nec hactenus valuit relevari. (A. C. 455.) Ind. VIII, Valentiniano VIII et Anthemio coss. Valentinianus princeps, dolo Maximi patricii, cujus etiam fraude Aetius perierat, in campo Martio per Optilam [Chiffl. Ostilam] et Traustilam Aetii satellites, jam percusso Heraclio spadone, truncatus est. Idem Maximus invasit imperium, tertioque tyrannidis suae mense membratim Romae a Romanis tractus discerptusque est [Al. discerptus est]. Gensericus rex Wandalorum, ab Eudoxia Valentiniani uxore epistolis invitatus, ex Africa Romam ingressus est, eaque urbe rebus omnibus spoliata, eamdem Eudoxiam cum duabus filiabus secum rediens abduxit. (A. C. 456. Ind. IX, Varane et Joanne coss. His consulibus innumera locustarum agmina fructum Phrygiae vastaverunt. Eucherius Lugdunensis Ecclesiae pontifex multa scripsit, tam ecclesiasticis quam monasticis studiis necessaria. (A. C. 457.) Ind. X, Constantino et Rufo coss. Marcianus imp. bonis principibus comparandus vitae spiritum amisit; imperavit annos VI, menses VI. Leo eidem defuncto successit, cujus voluntate Majorianus apud Ravennam Caesar est ordinatus. (A. C. 458.) Ind. XI, Leone Aug. et Majoriano [Al. add. Aug.] coss. Leo imp. pro tomo Chalcedonense per universum orbem singulis orthodoxorum episcopis, singulas consonantesque misit epistolas, quo sibi quid de eodem tomo sentirent cuncti suis rescriptionibus indicarent. Horum omnium episcoporum ita conspirantes suscepit epistolas, ut eas putares uno tempore unius viri eloquio fuisse dictatas. (A. C. 459.) Ind. XII, Patricio et Ricimere coss. Isaac Antiochenae Ecclesiae presbyter scripsit Syro sermone multa, praecipueque adversus Nestorianos et Eutychianos. Ruinam enim Antiochiae elego carmine planxit, quemadmodum Ephrem diaconus Nicomediae lapsum.

---

Marcellinus Comes, CHRONICON. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/marcellinus2.html.