# Epigrammata 1.29

Martial, Epigrammata, Poem 1.29. Latin.

Canonical: https://interlinea.aeterna-institute.org/library/latin/martial/epigrammata/1.29

Fama refert nostros te, Fidentine, libellos
Non aliter populo quam recitare tuos.
Si mea vis dici, gratis tibi carmina mittam:
Si dici tua vis, hoc eme, ne mea sint.

---

Martial, Epigrammata, ed. Wilhelm Heraeus, Jacobus Borovskij. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi1294/phi002/phi1294.phi002.perseus-lat2.xml.