# Epigrammata 4.67

Martial, Epigrammata, Poem 4.67. Latin.

Canonical: https://interlinea.aeterna-institute.org/library/latin/martial/epigrammata/4.67

Praetorem pauper centum sestertia Gaurus
Orabat cana notus amicitia,
Dicebatque suis haec tantum deesse trecentis,
Ut posset domino plaudere iustus eques.
Praetor ait 'Scis me Scorpo Thalloque daturum,
Atque utinam centum milia sola darem.'
A pudet ingratae, pudet a male divitis arcae.
Quod non das equiti, vis dare, praetor, equo?

---

Martial, Epigrammata, ed. Wilhelm Heraeus, Jacobus Borovskij. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi1294/phi002/phi1294.phi002.perseus-lat2.xml.