Latin · ~2 min
Poem 5.80
Martial, Epigrammata 5.80
Not analysed yet
Non totam mihi, si vacabis, horam,
Dones et licet inputes, Severe,
Dum nostras legis exigisque nugas.
'Durum est perdere ferias': rogamus,
Iacturam patiaris hanc ferasque.
Quod si legeris ista cum diserto
—Sed numquid sumus inprobi? —Secundo,
Plus multo tibi debiturus hic est,
Quam debet domino suo, libellus.
Nam securus erit, nec inquieta
Lassi marmora Sisyphi videbit,
Quem censoria cum meo Severo
Docti lima momorderit Secundi.