Latin
Poem 4.5
Martial, Epigrammaton Libri 4.5
Not analysed yet
Vir bonus et pauper linguaque et pectore uerus,
quid tibi uis urbem qui, Fabiane, petis?
Qui nec leno potes nec comissator haberi,
nec pauidos tristi uoce citare reos,
nec potes uxores cari corrumpere amici,
nec potes algentes arrigere ad uetulas,
uendere nec uanos circa Palatia fumos,
plaudere nec Cano, plaudere nec Glaphyro:
unde miser uiues? "Homo certus, fidus amicus."
Hoc nihil est: numquam sic Philomelus eris.