Latin
Poem 7.47
Martial, Epigrammaton Libri 7.47
Not analysed yet
Doctorum Licini celeberrime Sura uirorum,
cuius prisca grauis lingua reduxit auos,
redderis heu, quanto fatorum munere! nobis
gustata Lethes paene remissus aqua.
Perdiderant iam uota metum securaque flebat
tristities lacrimis iamque peractus eras:
non tulit inuidiam taciti reganator Auerni
et ruptas Fatis reddidit ipse colus.
Scis igitur quantas hominum mors falsa querellas
mouerit et frueris posteritate tua.
Viue uelut rapto fugitiuaque gaudia carpe:
perdiderit nullum uita reuersa diem.