Latin
Poem 7.84
Martial, Epigrammaton Libri 7.84
Not analysed yet
Dum mea Caecilio formatur imago Secundo
spirat et arguta picta tabella manu,
i, liber, ad Geticam Peucen Histrumque iacentem:
haec loca perdomitis gentibus ille tenet.
Parua dabis caro, sed dulcia, dona sodali:
certior in nostro carmine uoltus erit;
casibus hic nullis, nullis delebilis annis
uiuet, Apelleum cum morietur opus.