Latin
Poem 8.6
Martial, Epigrammaton Libri 8.6
Not analysed yet
Archetypis uetuli nihil est odiosius Eucti
(ficta Saguntino cymbia malo luto),
argenti furiosa sui cum stemmata narrat
garrulus et uerbis mucida uina facit:
"Laomedonteae fuerant haec pocula mensae:
ferret ut haec, muros struxit Apollo lyra.
Hoc cratere ferox commisit proelia Rhoctus
cum Lapithis: pugna debile cernis opus.
Hi duo longaeuo censentur Nestore fundi:
pollice de Pylio trita columba nitet.
Hic scyphus est in quo misceri iussit amicis
largius Aeacides uiuidiusque merum.
Hac propinauit Bitiae pulcherrima Dido
in patera, Phrygio cum data cena uiro est."
Miratus fueris cum prisca torcumata multum,
in Priami calathis Astyanacta bibes.