Latin
Poem 8.67
Martial, Epigrammaton Libri 8.67
Not analysed yet
Horas quinque puer nondum tibi nuntiat et tu
iam conuiua mihi, Caeciliane, uenis,
cum modo distulerint raucae uadimonia quartae
et Floralicias lasset harena feras.
Curre, age, et inlotos reuoca, Calliste, ministros;
sternantur lecti: Caeciliane, sede.
Caldam poscis aquam: nondum mihi frigida uenit;
alget adhuc nudo clusa culina foco.
Mane ueni potius; nam cur te quinta moretur?
ut iantes, sero, Caeciliane, uenis.