Latin · ~7 min
Lines 1.246-1.294
May, Liber Quintus 1.246-294
Not analysed yet
Solaque furtivum silvis deplangit amorem.
Amphitryoniaden falsum, tardumve vocabat;
Donec, plorantis frustra, magnique vocantis
Herculis auxilium, leto crudelior ipso
Bellua formosae laceravit virginis artus.
Amphitryoniades tristem Bebrycis ad aulam
Jam victor rediens, amissâ virgine demens,
Et formidandus luctu, per lustra ferarum,
Per juga, perque alti frondosa cacumina montis
Tendebat, sponsae quaerens vestigia carae,
Pyrenenque suam mosto clamore vocabat.
Pyrenen silvae, Pyrenen antra ferarum,
Et curvae toto resonabant monte cavernae.
Ingemuit locus ipse; ferae tremuêre; metuque
Montani latuêre lupi; nec quaerere praedam
Immanes audent ursi, torvive leones,
Dum nemore atque jugis graditur Tirynthius altis.
Sed, postquam laceros artus atque ora puellae
Deformata suae cognovit, fata Deosque
Multum incusavit lacrymans: tunc oscula caris
Relliquiis repetita dedit; supremaque plangens
Funera, Pyrenen tumulavit montibus illis.
"Diruet hanc," inquit, "molem non longa vetustas.
"Famaque tum tua major erit; tumulique ruina
"Augebit tumulum: toto tunc monte jacebis.
"Ut juga tota tenet Bacchus Nisea sepultus,
"Mons erit iste tuus." Consensit fama: tenentque
Pyrenes isti nomen per saecula montes.
Pompeii juvenes, instructo milite Gades
Linquentes, bellum omne locant, quâ pinguia Baetis
Culta secans, sua felici dat nomina terrae.
Oppida cepissent primo regionibus illis
Ateguam, atque Ucubin, et nomen clade futurâ
Funestum Ausoniae, Mundam, et te grata Camonis
Corduba, doctorum cunis fecunda virorum.
Undique Pompeiis vires Hispania mittit.
Hîc, praeter Latias aquilas, Romanaque signa,
Quae Varus, duxitque acer Labienus, Iberi
Pugnaces coëunt: hic trux stat Cantaber, armis
Qui vitam impendit solis, gens nescia pacis
Aut siccae mortis, ferro praevertere sueta
Imbelles annos: decus esse abrumpere vitam,
Naturaeque putant segnem donare senectam.
Augurii sacri, divinarumque peritam
Flammarum, pubem dives Gallaecia mittit.
Callaïci veniunt, qui, demto Marte, laborem
Non ullum novêre viri: nam semina sulcis
Injicit, et duro glebas invertit aratro,
Femina, dum manibus peraguntur bella virorum.